ചോദ്യം: മുസ്ലിംകളുടെയിടയിൽ ചില സഹോദരങ്ങൾ സ്വന്തത്തിന്റെയോ തങ്ങളുടെ മക്കളുടെയോ ഒക്കെ ബർത്ത്ഡേ പാർട്ടി നടത്തുന്നത് കണ്ടുവരുന്നു. എന്താണ് ഇപ്രകാരമുള്ള ആഘോഷങ്ങളുടെ മതവിധി ?
ഉത്തരം: ഇബാദത്തിന്റെ അടിസ്ഥാനപരമായ തത്വം അവ തൗഖീഫിയാണ്, അഥവാ അവ മതപരമായ പ്രമാണങ്ങൾ കൊണ്ട് സ്ഥിരീകരിക്കപ്പെട്ടതും വ്യക്തികളുടെ അഭിപ്രായങ്ങളിൽ മാററുവാൻ പാടില്ലാത്തതുമാകുന്നു. ഉദാഹരണത്തിന് അല്ലാഹുവിനെ ആരാധിക്കുന്നതിന് അവന്റെ കൽപ്പനയ്ക്ക് വിരുദ്ധമായ (നബി (സ്വ) പഠിപ്പിക്കാത്ത) ഒരു മാർഗ്ഗം പാടുള്ളതല്ല. എന്തെന്നാൽ സ്വഹീഹായ ഒരു ഹദീഥിലൂടെ പ്രവാചകൻ നമ്മെ പഠിപ്പിക്കുന്നു. ‘ആരെങ്കിലും നമ്മുടെ ഈ വിഷയത്തിൽ (ദീനിൽ) പുതിയതായി എന്തെങ്കിലും കൊണ്ടുവന്നാൽ അത് തള്ളപ്പെടേണ്ടതാണ്.’ മറെറാരു രിവായത്തിൽ ‘നമ്മുടെ ചര്യകളിലില്ലാത്ത ഒരു കർമ്മം ആരെങ്കിലും (മതത്തിൽ) കൊണ്ടുവന്നാൽ അവ തള്ളപ്പെടേണ്ടതാണ്’ എന്നും കാണാം.
ജൻമദിനാഘോഷം എന്നത് ഒരു ബിദ്അത്ത് ആകുന്നു. അത് ആരുടെ പേരിലായാലും അവർ എത്രതന്നെ ഉന്നതരായിരുന്നാലും ശരി, അനുവദനീയമല്ലതന്നെ.
സൃഷ്ടികളിൽ ഏററവും ശ്രേഷ്ഠരായവരും പ്രവാചകൻമാരുടെ നേതാവുമായ മുഹമ്മദ് ഇബ്നു അബ്ദുള്ള(സ്വ) ഒരിക്കലും തങ്ങൾ ജനിച്ച ദിവസം ആഘോഷിച്ചതായോ, തന്റെ ഉമ്മത്തിനോട് (വിശ്വാസിസമൂഹം) ഈ ദിവസം ആഘോഷിക്കുവാൻ കൽപ്പിച്ചതായോ കാണുവാൻ കഴിയില്ല. അപ്രകാരംതന്നെ ഈ ഉമ്മത്തിലെ ഏററവും മുൻപന്തിയിൽ നിൽക്കുന്ന ഖുലഫാഉറാശിദീങ്ങളോ സ്വഹാബികളോ പ്രവാചകന്റെ ജൻമദിനമോ മററാരുടെയെങ്കിലും ജൻമദിനമോ ആഘോഷിച്ചതായി നമുക്ക് കാണുവാൻ സാധിക്കുകയില്ല. എല്ലാ നൻമയും അവരുടെ മാർഗ്ഗത്തെ പിൻപററുന്നതിലും പ്രവാചകന്റെ അദ്ധ്യാപനങ്ങളുമായി തന്റെ ജീവിതത്തെ ക്രമീകരിക്കുന്നതിലുമാണടങ്ങിയിട്ടുള്ളത്. മാത്രവുമല്ല, ഇത്തരം ബിദ്അത്തുകൾ ജൂതൻമാരെയും ക്രൈസ്തവരെയും മററു അവിശ്വാസി സമൂഹങ്ങളെയും അവരിലുള്ള ആഘോഷങ്ങളെ അനുകരിക്കുന്നതിലേക്ക് വഴിതെളിക്കുന്നതുമായിരിക്കും. അല്ലാഹുവിലാണ് അഭയം.
ലജ്നത്തുദ്ദാഇമയുടെ ഫത്വകൾ No. 2008
കടപ്പാട് : telegram.me/fatwaalislamiyya
Comments
Post a Comment